COVID-19: Funu foun entre Inimigo Universal, Invisivel e Única arma humana “Sistema Immune” Oin sa ita reforza nia?

 by  dr. Sidonio  João da  Silva Pereira, Master iha Investigasaun Inmunolójika 

Introdusaun

Coronavirus deskobre primera vez iha tinan 1930s ne'ebé komesa ho infeksaun respiratoria aguda iha manu ne'ebé provoca Infectus bronchitis virus ka IBV. 

Iha 1940s izola tan tipu coronvirus rua maka hanesan Mouse Hepatite Virus ka MVH, i Trasmisible Gastroenteritis Virus ka TGEV.

Coronovirus iha ema foin  deskrobre iha tinan 1960s, iha ema ka pasiente ida ho sintomas gripe komun ne'ebé depois hanaran Human Coronavirus 229E i Human Coronavirus OC43. Corona Virus sira seluk iha ema detekta iha tinan tuir mai hanesan SARS-CoV2003 (Severe Acute Respiratory Syndrome-CoV2003),  HCoV NL63 iha 2004,  HUK1 iha 2005,  MERS-CoV ( Middle East Respiratory Syndrome related-CoV)  iha 2012 i SARS-CoV19 iha 2019. Kuaze virus sira ne'e provoka hotu infeksaun iha  vias respiratoria.

SARS-CoV 19  hahu mosu iha sidade Wuhan, Xina iha Dezembru 2019. OMS deklara hanesan emerjencia mundial iha 30 janeiru 2020 i depois, iha 11 marsu 2020,  OMS deklara hanesan Pandemia.

Estrutura simplifikada husi Corona virus

Jeralmente, virus corona iha ita ema bele provoka infeksaun respiratoria leve ka kaman hanesan gripe komun ne'ebé bain bain existe ka lao iha ita nia sosiedade, maibé iha  ka pasientes balun bele induz kondisaun grave liu ne'ebé  ita la espera, i termina ho mate liu husi provokasaun lesaun ka kakanek agudu  iha tesidu pulmonar (pulmaun) i Sindrome Difikuldade Respiratoria Aguda ne'ebé bele afekta seriamente pasiente nia kapacidade respiratoria hodi halo nia  mate. Purtantu, relasiona ho Pandemia ka Surtu CoVid-19, mundo tomak seidauk iha vasina no aimoruk espesífiku evidensiadu i komprovadu sientifikamente ne'ebé iha potensia letal kontra virus refere. 

Nune’e defeza diak liu i únika arma ne'ebé ita ema iha maka ita nia Sistema Imunu ka Sistim Kekebalan Tubuh. Nune’e ita tenki esforsa- an atu oin sá ita ida-idak hola papel rasik hodi optimiza ita nia sistema imunu (kekebalan tubuh) ne’e rasik , hodi  nune'e,  sistema ida ne’e perparadu liu tan atu hasoru surtu ida ne’e. 

Hanesan ita hotu hatene ona,  Timor Leste agora dadauk iha ona kazu komfirmadu ka pozitivu 8 (walu), no expetativa ne'ebé maka ita iha maka sedu ka tarde, talvez kazu positivu sei aumenta, basá ita iha ona risku nia  laran atu kontajia infeksaun ne’e rasik iha kualker momentu, i pelu menus ita bele infektadu husi virus ne’e  maibé ita hakarak minimiza nia karga virais liu husi optimiza ita nia sistema immune ka defeza isin lolon nian hodi luta hasoru virus ida ne’e.

Nune’e artigu ida ne’e hakerek nain hakarak fahe ba maluk le nain sira no sosiedade timor ein jeral liu husi konsume suplementu vitaminas, minerais, evita stress, pániku exesivu,  la fuma i  la hemu tua no seluk seluk tan ne'ebé sei explika detalladamente  iha segementu sira  tuir mai

Ita agora dadaun hasoru hela moras ne'ebé provoka husi virus foun (Coronavirus  ka Covid 19 ) nune'e ita nia organismu seidauk jera ka hamosu   inmunidade tamba razaun ita nunka hasoru ka sofre infeksaun husi virus ne'e  rasik.
Iha kontextu emergencia sanitaria  ba Covid-19 ida ne’e, hakerek nain hakarak tatoli informasoens sientifikas i  relevante balun ba populasaun ka sosiedade timorense tamba  koñesimentu  mak arma lolós mai ita oin sá ita organiza ita nia-an no potensializa ita nia sistema defesa (imunidade) hodi luta hasoru inimigu invizivel  ida ne’e. 

Objetivus
Iha aritigo ida ne;e ita sei koalia oituan konaba

1. Ita nia sistema imunu ka (kekebalan tubuh) ho nia komponentes sira
   
2. Komportamentou Covid-19 wainhira  afekta no invade ita nia organismu
3. Sistema defeza iha luta hasoru Covid -19, no
   
4. Saida mak ita bele halo hodi potensializa ita nia sistema defesa ka imunu ne'e  rasik hodi bele halo nia  aptu hasoru Covid -19 husi perspektiva suplementu alimentar no pratica hahalok saudável

Ita nia sistema imunu i nia componentes sir
Mai ita hahu esplika ho forma sintetika, konaba saida los maka ita nia sistema imunu.
Sistema imunitariu ne’e hanesan konjuntu estrutura i makanismu iha organismu ida ne'ebé permite atu manten iha ekilíbriu  husi agresaun externas hanesan patojenos ka mikrobios, kontaminantes, i radiasaun venenoza, no  agresaun  interna hanesan sélulas kanserozas.

Sistema ida ne’e kompostu husi selulas lubuk ida ne'ebé hela iha ita nia likidus korporais (ran, linfa, i sekresaun sira seluk ), i  tesidos ka jaringan  hanesan ganglius limfatikus, basu/ook, amigdalas, ect..), i selulas sira ne'e  rasik produz husi ita nia medula ósea ka sumsum tulang.

Sistema imunu iha tipu 2, Inatu ka inespesifiku i adkiridu ka adaptativu;

1. Inatu signifika katak existe ho forma natural iha organismu, sistema ne'e  rasik prezente iha kuaze seres vivus hotu-hotu.  Selulas sira ne'ebé pretense ba sistema ida ne’e maka: Neutrofilus, Bazófilus, Eosinofilus, Makrofagus, Dendritas, Mastositus i Selula Natural Killer ka naran komun iha kampu imunolojia maka selula NK.
   
   Selulas hirak ne’e iha nia mekanismo espesifico rasik ne'ebé permite sira bele identifca Selula saudável no Selula infectada ka hakanek  husi agresaun sterna i interna  hanesan patogenos ka microbio (virus, bacterias, parasitos, fungos, quemaduras, radiasaun venenosa i ect..),  hodi luta hasoru i combate sira. Entre mecanismos ne'ebé selula hirak ne'e  uza hodi luta hasoru inimigo maka hanesan, Fagocitosis (tolan), Produsaun peptides antmicrobianos, ativasaun sistema complemento hodi harahun Selula infectada, nune’e mos  halo papel ida importante teb-tebes  maka  apresenta patogenos sira ne'ebé invade organism ba sistema imunu adquirido ka adaptativa i ativa sistema ida ne’e hodi perpara an para bele tama ba campo batalha ka ajuda neutraliza situasaun.
   
   Ho maneira simples, atu hateten katak Sistema Innato halo nia knar iha primera linea hodi luta uluk i ao mesmo tempo fanun sistema Inmune adquirido ka adaptativa liu  apresentasaun antigen husi patogenos ba sira i nune'e  hodi sistema ida ne’e mobiliza no perpara an ba luta hasoru inimigo.


2. Adkiridu ka adaptativu katak selula sira ne’e sei produz wainhira iha ona kontaktu ho sinal ka simu informasaun husi selula preszntadora antijenu  (selula dentritika)  husi sistema imunu inatu, liu husi ativasaun sinais biokimikus, i  nune’e selula hirak ne'ebé pretense ba sistema ida ne’e bele organiza no mobiliza-an liu husi produsaun antikorpus espesifikos   husi  Limfocito B i   ativasaun Selula T sitotoxika hodi tama ba liña kombate wainhira presiza.
   
   Purtantu Selula B ho T maka hanesan komponente prinsipal  husi sistema ida ne’e. Presiza hatene mos katak existe Limfositu T tipo rua maka pretense ba sistema ida ne’e (Linfositu  T sitotoxiku i  limfocito T kolaborador), kada ida halo nia funsaun diferente  maibé ho finalidade ida deit, maka harahun no elimina patojenos sira.
   
   Ho maneira badak, atu hateten katak sistema imunu adquirido ka adaptativo halo funsaun segunda liña i espesifiko ba kada patojeno iha ita nia organismu, wainhira hetan avizu ka fanun husi sistema inatu liu husi aprezentasaun antijenos ba sira. 

Iha figura kraik bele hare ho forma badak explikasaun ne'ebé temi ona iha leten.

Diagrama iha leten fo ilustrasaun simplifikada konaba lalaok sistema imunu np, importante tebes, tamba sá mak ita tenki konsome mikronutrientes, no sira nia impaktu ba ita nia sistema imunu.

Infeksaun  Covid -19
Entaun, tamba  ita hatene oituan ona kona  ba saida mak ita nia Sistema Imunu, maka,  tuir mai, ita kulia fali konaba saida mak Covid -19.

Laós estrañu ona ba ema iha mundu tomak saida mak Covid - 19. Ohin loron iha nasaun barak, inklui Timor-Leste, hasoru dadaun hela situasaun estrasante ida ne’e, ne'ebé provoka husi inimigu universal i invisivle ida ne.e. Virus ne’e rasik hamate ona ema rihun ba rihun iha nasaun barak i kada loron  país dezemvolvidu sira relata kazu mate liu  husi mil iha 24 horas nia laran, ka globalmente reprezenta 2-3%. Nune’e mos, sifra infektadus kada loron sae hela deit.

Maski nune’e, hanesan funu foun ida tenki hasoru mesmu ke to'o ohin loron mundu laiha arma ka aimoruk espesifiku ba inimigu ida ne; moras foun ida ne'ebé provoka husi virus foun, ne'ebé ita nia organismu seidauk jera  ka produz imunidade espesifika, tamba ita nunka sofre iha tempo uluk liu ba.

Virus ne’e rasik nia infektividade makás lós no fasil hadaet husi ema ida ba ema seluk, posivelmente tamba fenomenus sira hanesan tuir mai ne’e:

1. Portadores asintomatikus durante periodo inkubasaun husi loron  2 to'o 14
2. Trasminte ho fasil no lais tebes husi ema ida ba ema seluk wainhira iha kontactu besik ho individuu ne'ebé pozitivu ba Covid -19 (husi mear, kulia ka fani etc..)
3. Tuir artigo sientifiku balun dehan katak virus ne'e  rasik bele sobrevive husi loron 3 to liu semana iha liur sein tama iha organismu umanu

Oin sa Covid 19 atua iha ita nia organismu 
Evidensia sientifika hotu, kuase hateten katak virus ne'e  rasik tama liu husi ita nia via respiratoria maka hanesan husi inus, garganta hafoin to iha pulmaun liu husi uniaun proteina S virus nian ho reseptor ACE (Angiotensin Converter Enzym-2) ne'ebé hetan barak liu Alveolu pulmonar. Purtanto hahu husi ne’e virus infekta selula umana no  tama iha selula i modifika funsaun selula ne'e  nia funsaun hodi multiplika-an ka kopias i provoka selula ne'e  rasik mate. Husi pontu de vista fiziolojiku, wanhira selula ida husi orgaun ruma mate, nune'e nia funsaun mos sei altera ka tergangu.

Mekanismu asaun Covid-19 iha sélula umana i oinsá respota ne'ebé koordena husi sistema imunu hodi luta hasoru.

Tamba Corona virus  ka Covid - 19 afekta primeramente via respiratoria no preferivelmente ita nia pulmaun, maka iha ema balun hatudu deit sintomas kaman hanesan fani, mear, isin manas,  maibé iha individuo ka pasiente balun bele agrava ba lezaun pulmonar aguda i Sindrome de Dificuldade Respiartoria Agudu ne'ebé finalmente manifesta ho is boot  tamba anin tama sai iha pulmaun alteradu ona, pois  pulmaun la bele oferese oxijeniu ho kuantidade aduakuadu ba orgaun sira seluk hanesan rins, kurasaun, kakutat,  ect…), konsidasaun ida ne’e aumenta  ho resposta inflamatoria exagerada husi ita nia sistema imunu ne'e  rasik termina ho fallansu multioragniku i hamate pasiente.

Iha vias rua ne'ebé maka lori pasiente ida infektadu ho Covid -19 bele mate:

1. Grupu pasientes jovens balun  ne'ebé hetan infeksaun ba Covid-19 i mate, maski nia sistema imunu dehan aptu atu kombate virus refere,  maibé sira mate tamba problema sira nia sistema imunu exesivamente estimuladu ho prezensa virus nian i  provoka libertasaun ka produsaun proteinas mediadores imflamatorios naran Tormentas de CITOCINAS ataka rasik fali selula ka alveolus pulmonar hodi resulta sindroma  difikuldade respiratoria aguda i  mate.
2. Iha  grupu pasientes sira ne'ebé  idade avansada ka idozus, diabetikus ka ran midar ne'ebé la kontrola glisemia ka taxa ran midar regularmente, moras Pulmonar Obstrutivu Króniku  ka Chronic Obstructive Pulmonary Diseases (COPD) i hanesan bronkite kronika  ho emfizema, pasiente ho estadu imunokomprometidu ka HIV/SIDA, pasiente sira ne'ebé sofre insufisiensia renal krónika ka  Chronic Kidney Disease (CKD) , i hirak ne'ebé ho moras kankru kualker tipu,  pasiente hirak ne’e konsidera hanesan grupo ho risku áso tamba sira nia sistema imunu debilitadu ka lemah, purtantu la bele organiza-an ho forma adekuada atu responde karga virais Covid -19 nian i nune’e sira fasilemente dezenvolve pneumonia i sindroma difikuldade respiratoria aguda, insuficiencia kardiaka, sepsis no mate.
   
   “Hakarak habadak iha parte ida ne’e katak Virus ka Covid -19 la hamate deit ema idozus ka idade avansada sira hanesan ema barak iha sosiedade nia let tau iha sira nia hanoin ne'e.”

Tormenta de Citocinas: prosesu ida ne’e akontese wainhira organismu   umanu presebe katak virus Covid -19 ataka nia fortemente no liu kapasidade sistema imunu nian oin sa mak atu maneija i neutaliza carga virais ne'ebé bot ho resposta imunu normal.

Evento ida ne’e bele mosu liu husi mekanismu hirak tuir mai:

1. Virus bele sai virolentu liu ka makas liu hodi ativa ka dezenkadeia tormenta citocinas ne'e  rasik, i exesivamnte hakanek pasiente nia pulmaun i orgaun seluk hanesan fuan, rins ho aten i termina ho fallansu multiorganiku no hamate pasiente.
2. Tamba virus ne’e foun, ita nia sistema defeza ka imunu seidauk prontu ka organizado atu rekoñese nia hanesan patojeno i aprezenta ba sistema defeza espesifika hanesan selula T i B atu regula nia atuasaun ho forma programada,  maibé kontrariamente ativa direta deit makrofagus i selula dendritas husi sistema inatu, selula rua ne'e  poderoza ka potente tebes  maibé, au mesmu tempu,  agresivu liu hodi provoka estragus ka danus  kolaterais iha orgaun seluk. Ida ne’e mak justifika tamba sa pasientes jovem sira mos bele mate tamba Covid - 19.
3. Virus ne'e  rasik tal vez la forte sufisientement atu provoka tormenta de citocinas,  maibé  nia bele provoka infeksaun sekundaria hanesan pneumonia virais, atu hateten katak pasiente ne’e la mate tamba tormentas de citocinas,  maibé tamba infeksoens sekundarias. Ida ne;e justifika katak pasientes idozus, ho hirak ne'ebé sofre hela  moras seluk hanesan temi iha leten ne’e mate tamba kauza husi mekanismu ida ne’e.

Saida maka ita bele halo atu optimiza ita nia immunidade?
Husi pontu de vista imunolojiku i nutrisional, ita bele manten ita nia sistema imunu hodi halo nia funsaun korreta, ida ne’e ita bele alkansa liu husi hahalok simples rua ne'ebé ita halo  diariamente hanesan: “Han hahan ne'ebé suadavel, variable i adekuada ne'bé  riku ho mikronutientes, nune’e mos promove hahalok moris saudavel.”

Papel alimentasaun iha ita nia Sistema Immune.
Alimentasaun adekuada, ekilibrada i saudavel bele favorese resposta sistema imunu hasoru agresaun patojenos sira, ho razaun tamba sistema imunu umanu fortemente influensiadu ho ajentes antioxidantes ne'ebé ita konsume liu husi hahan i ezerse papel importante iha ita nia defeza organismu   kontra patojenos externos i internus.

Purtantu, atu organismu  ka ita nia isin bele kombate Covid-19, tenki konsume dieta ne'ebé ekilibrada, variada i kontein  nutirentes adekuadus.

a)    Mikronutrientes (vitaminas i minerais)
Vitaminas: A,D, C, E, B6 i B12, zinku, folatu, ferru, kobre, selénio, hirak ne’e dezempeña papel importante los i dala barak halo asaun sinérjiku iha kada etapa husi resposta imunu ita ema nian hasoru patojenos, tamba ne’e se ita konsume ka injere adekuadamente mikronutrients hirak ne’e bele ajuda modula diak liu  ita nia sistema imunu hodi prepara-an diak antes hasoru kualker infeksaun.
Husi micronutrients hirak ne'e, sira ne'ebé iha forte evidensia sientifika hatudo katak vit C, D i zinku apoia tebes sistema imunaitariu hodi halo nia funsaun i nune’e diminui risku infeksaun.

Vitaminas	Bele hetan husi	Papel imunolójiku
C	Sabaraka, hás tasak, tanjerina, ananás, modo matak hanesan repollu, brokoli, etc.	Aumenta resposta imunu
E	Azeite oliveira virjen extra  (extra virgin olive oil), vejetais matak, sereal sira etc.	Aumenta resposta imunu
A	Manutolun, nán aten ka fígadu, mode koloridu, pateka, produtu sira husi susubén, etc.	Mellora funsaun sistema imuni hasoru infesaun
D	Yogurt	Aumenta defeza imunolojika hasoru agresaun patojéniku externu  no internu
Kompleksu B i ásidu fóliku	Iha maioria vejetais no aifuan kor matak, ikan, mariskus, manutolun, no produtu sira husi susubén,	Aumenta produsaun antikorpu ka antibody
Zinku, Seléniu	Kuaze iha nán sira hotu, ikan, fígadu, aifuan no modo matak, manutolun	Hamosu imunidade isin (kekebalan tubuh)

b)    Suplemento tradicionales
Xá Ekuinasea, (Yogi Tea), iha propiedades imunoestimulante ne'ebé potensializa produsaun i atividade limfositus i makrofagus, aumenta produsaun interferon ne'ebé mellora resposta imunu hasoru infeksoens virais.
Xa verde-katekinas, hola papel hanesan antioxidante, nune’e ajuda protégé selulas kanek provoka husi radiis livre i fortalese sistema imunu

Promove hahalok moris saudavel
a)    Stress
Evita stress iha situasaun saida deit tantu iha uma no servisu fatin, tamba dadus sientifikus hatudu ona katak ema ne'ebé ho status stress exesivu bele provoka imunosupresaun liu husi mekanismu ormonal husi sistema iipotalamo-ipofizis-ddrenokortikal i  liberta ormona kortizol i adrenalina, komponente rua ne’e koñesidu iha kampu imunulojiku hanesan immunosupresor.

b)    La bele hemu tua
Alkohol afeta ba ita nia sistema imunu ka defeza ho dalan rua:

1. Afeksaun aguda ka imendiata:  alkohol provoka mobilizasaun selulas inflamatorias hodi ataka fragementu ka substansia husi alkohol ne'ebé sira rekoñece hanesan ajente agressor externu,   maibé iha tempo hanesan alkohol iha nia kapasidade blokeia funsaun selula sira ne'ebé pretense ba sistema inatu hanesan makrofagus i selula dendrite,  hodi altera sira nia funsaun hanesan fagositosis i aprezentasaun antijen i nia konsekuensia maka ita nia sistema imunu labele halo kordenasaun funsaun ho diak atu kombate ka ataka virus i mikrobiu sira seluk.
2. Afeksaun kronica ka tempo naruk: alkohol afekta produsaun selula T ho selula B i nia funsaun, nune’e fo konsekuensia ba ita nia organismu  la preparadu atu luta hasoru virus ka microbius seluk wainhra hetan agresaun husi sira.

c)    La bele fuma
Evidensias sientifikas hatudu ona katak sigarru kontein mais de 200 substansias altamenete toxikas ne'ebé uma vez tama ba iha organismu  liu husi vias respiratorias, altera ka debilita  funsaun siliar ho mukoza  iha parte ne’e i nune’e sira la bele halo nia funsaun hanesan barrera fizika ho diak hodi expulsa sai patojenos ne'ebé tama, konsekuansia fo dalan ba mikrobius patojenos alkanza pulmaun hodi provoka  infeksaun pulmonar.

Nune’e mos iha medisina hatene no deskreve ona katak ema fumadores sita fasil dezemvolve moras pulmaun obstruttiva kronika ka  Chronic Obstructive Pulmonar Disease (COPD),  Bronkite kronika i emfizema, no kankru pulmaun.

Pasientens hirak ne'ebé ho kondisaun sira hanesan ne'e fasil atu apaãa virus Covid -19 i virus sira seluk no dezenvolve sindroma dificuldade respiratoria aguda i mate haneasan temi ona iha leten.

Iha mos evidensia balun hateten katak, nikotina ne'ebé iha sigarru laran, kuando tama ba organismu  sei interfere  funsionamento neutrofilus i halo  selula ida ne'e  produz kuantidade barak proteina ida naran MMP-9. Protein ne'e  halo papel degradasaun patojenos husi mikrobius, i iha tempu hanesan,  bele halo destruisaun mos ba tesido husi organismu  umanu.

Nune’e sientista sira koncidera katak protein ida ne'e  mak halo papel fundamental ba hamosu moras  Chronic Obstructive Pulmonar Disease (COPD)

d)    Exersisiu fiziku
Importansia husi exersisiu fiziku atu mellora sistemea imunu parase hansaesan tema interesante ida, i iha vida real hatudu katak ema ne'ebé halo exersisiu fiziku ho forma regural, adekuada i moderada, hetan menus infeksaun ka moras kompara ho ema ne'ebé maka nunka ka la halo exersisiu fiziku ka sedentario.

Iha perspektiva imunolijia nian, exersisiu fiziku ne'ebé bele modula resposta imunolokica mak ho karater moderadu katak la bele tensu no kolen liu wainhira halo esersisiu ruma tantu lao ka halai ou seluk seluk tan.
Iha kontextu ida ne’e,  oin sa esersisiu fiziku hola papel iha melloria resposta sistema immune? Ida ne’e liu husi modula produsan selula natural killer ka NK ne'ebé hola nia palel iha sistema inato hodi destrói selulas kanserozas i selula infektadas ho virus.

Versaun seluk ne'ebé haforsa katak exersisiu fisiku ne'ebé reguladu, moderadu i adekuadu evita ka reduz stress psikolokika, nia papel imunolojika explika ona iha leten.


Mensajen xave
“Laos ema hotu ne'ebé hetan infeksaun husi CoVid 19 tenki mate, laos ema idozus no imunokomprometidus sira deit mak mate,  maibé mate ka moris i hetan infeksaun ka lae, depende ba ita nia sistema imunu no depende mos ba ita nia maneira moris saudavel i disiplina hodi kumpri regras saúde públika nian”

Obrigado wain, Maromak, Mate bian, Beiala no Rai lulik Timor nian sei la taka matan ba ita.

Referencias

1. Gombart AF, Pierre A, Maggini S. A Review of Micronutrients and the imunu System-Working in Harmony to Reduce the Risk of Infection. Nutrients. 2020;12(1):236. Published 2020 Jan 16. doi:10.3390/nu12010236
2. Janeway CA Jr, Travers P, alport M, et al. Immunobiology: The imunu System in Health and Disease. 5th edition. New York: Garland Science; 2001. The components of the imunu system.
3. Isbaniah F, Wiyono WH, Yunus F, Setiawati A, Totzke U, Verbruggen MA. Echinacea purpurea along with zinc, selenium and vitamin C to alleviate exacerbations of chronic obstructive pulmonary disease: results from a randomized controlled trial. J Clin Pharm Ther. 2011 Oct;36(5):568-76.
4. Lee, Kuo-Hsiung et al. “Recent progress of research on medicinal mushrooms, foods, and other herbal products used in traditional Chinese medicine.” Journal of traditional and complementary medicine vol. 2,2 (2012): 84-95.
5. Tisoncik JR, Korth MJ, Simmons CP, Farrar J, Martin TR, Katze MG. Into the eye of the cytokine storm. Microbiol Mol Biol Rev. 2012;76(1):16–32. https://www.ncbi.nlm.nih.gov/pmc/articles/PMC3294426/
6. Gregory J. Leyer, Shuguang Li, Mohamed E. Mubasher, Cheryl Reifer, Arthur C. Ouwehand, “Probiotic Effects on Cold and Influenza-Like Symptom Incidence and Duration in Children.” Pediatrics  124  No. 2  August 1, 2009 pp. e172 -e179. http://pediatrics.aappublications.org/content/124/2/e172.full.pdf+html
7. Bradley KC, Finsterbusch K, Schnepf D, et al. Microbiota-Driven Tonic Interferon Signals in Lung Stromal Cells Protect from Influenza Virus Infection. Cell Rep. 2019;28(1):245–256.e4. http://dx.doi.org/10.1016/j.celrep.2019.05.105
8. Boga JA, Coto-Montes A, Rosales-Corral SA, Tan DX, Reiter RJ. Beneficial actions of melatonin in the management of viral infections: a new use for this”molecular handyman”? Rev Med Virol. 2012 Sep;22(5):323-38.
9. Sánchez-Barceló EJ, Mediavilla MD, TanDX, Reiter RJ. Clinical uses of melatonin:evaluation of human trials.Current Medic-inal Chemistry2010;17: 2070–2095.
10. https://www.elmundo.es/elmundosalud/2008/04/21/tabaco/1208762568.html
11. http://globoesporte.globo.com/eu-atleta/saude/noticia/2016/02/atividade-fisica-fortalece-imunidade-e-ajuda-combater-estresse-e-doencas.html 

dr. Sidonio Joao da Silva Pereira, MIInmo. Idade 38 Anos Medico Geral iha Departamento Banco de Urgencia HNGV Hasai Curso Medicica Geral husi Faculdade Medicina UNTL iha 2012 Hasai Curso Mestrado ka  S2 iha Investigasaun Inmunologia, iha Universidad Complutence de Madrid, Espanha 2015.